Cerita tu nyadi ba menua Jipun bekau ke udah kena pangka umbak Tsunami ba taun 2011 tu kemari. Lebuh bala penyelamat datai ba rumah siku indu, dia sida tetemu ke bangkai indu nya ke udah mati, tang meh tubuh ya ke mati nya tadi bengkok. Pala patung ya baka urang ke benung sembiang. Tubuh iya baka ke bungkuk ke mua ketegal ke di tinggang rumah ya ke runtuh. Meda baka nya dia sida ke deka nulung tu tadi lalu ninggal ke rumah nya, laban ka ngiga urang ke agi idup. Taja pia, kepala penyelamat tu tadi agi mengkang irau ati ingat ke gaya tudah indu tu tadi mati baka nya.
Udah nya tadi kepala penyelamat tu lalu nikal baru ngagai rumah indu nya lalu nguji ngabas bangkai indu nya tadi. Udah ya nilik ke baruh bangkai indu nya , dia ya tepeda ke bisi kain siti ba baruh indu nya lalu ya nguji narit kain nya tadi. Enda mukai-mukai dia ya lalu tepeda ke anak mit ke berumur 3 bulan ba dalam kain nya tadi.Dia ya lalu ngagau ke bala penyelamat ke bukai madah ke iya tetemu ke anak mit ke agi idup ba baruh bangkai indai iya. Bala lutur pan lalu beguai meresa anak mit nya tadi. Tang meh anak mit nya mengkang jenak tinduk, baka ke nadai apa nama nyadi sepengudah bekau pangka umbak tsunami ke sebedau nya.
Lutur ke meresa anak mit nya tadi lalu muka abis kain ke di kena mungkur anak mit nya tadi, dia iya tetemu ke telepon bincing siti ba baruh kain di kena mungkur nembiak tu tadi. Lebuh sida meda telepon bincing nya tadi, dia sida tebaca ke mesej ke di tulis ba telepon bincing nya "Enti nyema nuan ulih idup, nuan mesti ingat aku sayau ke nuan." Semua sida ke macha mesej nya tadi enda ulih ngetat ke ati ngenang ke indai iya udah ngidup ke anak iya ngena chara ke pemadu ya merinsa bakanya.Baka nya meh penyayau indai kek kasih ke anak, enda ngira nyawa, enda ngira seput diri nadai, asal meh anak ya ulih besai.
sekeda gambar sepengudah Tsunami ba menua Jipun.
